(//www.tvsmo.com)
【大紀元4月16日訊】中國人講飲水思源，好多白手興家有錢佬發達，都鍾意返鄉下起橋築路，光宗耀祖之餘又造福家鄉，一舉兩得。不過，身為全國政協副主席霍英東，近日卻因為十幾年前的善舉激到成肚氣。

蘋果日報報導, 話說十八年前廣東開放，為支持家鄉建設，霍英東同已故澳門聞人何賢，以及何添昆仲捐一千萬港幣畀番禺市政府，興建由番禺貫通廣州洛溪大橋，呢筆錢後來輾轉增值變成七千萬，大橋於八八年落成，當地重專門橋邊立塊碑，多謝老霍及何賢昆仲熱情襄助。

點知，今年初廣州市開人大會時，有位代表對洛溪大橋長年向使用者收過橋費提出質詢，要求番禺市政府交代。番禺市政府竟然報出一筆總額達一億零三百萬元借貸清單，重話要繼續收費七年先至可以全部清還，但清單上卻絲毫不提老霍當年的七千萬捐款。老霍見狀大為不滿，於是同位人大講：「洛溪大橋係我捐贈，我從來沒有從洛溪大橋收費中獲得一分錢！今後也不要一分錢！」

老霍為乜咁嬲？佢身邊老友對八方話，老霍其實唔係要追究佢捐七千萬去邊，亦唔係想番禺還錢，而係怕外界誤以為佢有份收「買路錢」，毀佢一世英名！

講開老霍同佢鄉下，八方聽過一個傳聞，唔知真定假。話說番禺其實唔係霍英東鄉下，因為老霍係水上人家，上幾輩都在珠江流域漂流，居無定所，無根可尋。據講，老霍一向渴望能夠有個故鄉，呢個願望俾佢老友何賢知道，於是帶佢返自己鄉下番禺行行，點知老霍一見呢個魚米鄉就極之鍾意，於是立即認番禺為鄉下，從此成為番禺人。

(//www.dajiyuan.com)

    相關文章